O principio DACH baséase no recoñecemento fundamental da diversidade dos países de fala alemá, principalmente Alemaña, Austria e Suíza.
O Centro de Linguas Modernas da USC, o lectorado do Deutscher Akademischer Austauschdienst (DAAD) e Österreichischer Austauschdienst (OeAD), en cooperación co Foro Cultural de Austria en Madrid, a AT Filmakademie e o Goethe-Institut organizan 'DACH-Kino', un ciclo de cinema arredor dos filmes dos países de lingua alemá que pretende dar a coñecer a súa riqueza e a diversidade cultural e lingüística.
Coordinado por Laura Stupperich, Sebastian Windisch e José Manuel Pérez Pena, o ciclo programa do 29 de marzo ao 10 de maio unha serie de seis filmes que destacados das cinematografías alemá, austríaca e suíza. Todas as proxeccións serán os martes ás 19.30 horas no Salón de Actos da Facultade de Filoloxía.
A quinta das sesións terá lugar o martes 3 de maio coa proxección e curtametraxes en cooperación entre a Academia do Cinema Austríaco e o Ministerio Federal de Asuntos Europeos e Internacionais, que tamén inclúe curtametraxes de Premios do Cinema Austríaco distinguidas en festivais internacionais.
As curtametraxes en proxección son Die beste Stadt ist keine Stadt, de Christoph Schwarz (2019, 15 min); Der Wächter, de Albin Wildner (2019, 33 min); Topfpalmen, de Rosa Friedrich (2020, 20 min); e Die Waschmaschine, de Dominik Hartl (2020, 24 min).
A sesión contará coa presentación de Sebastian Windisch.
