A terceira sesión deste semestre do ciclo de proxeccións CineFilo da Facultade de Filoloxía será este martes 20 de febreiro a partir das 17.00 horas no Salón de Actos. A asistencia é libre ata o límite da capacidade do espazo e a actividade é aberta e conta co recoñecemento dun crédito transversal para todo o estudantado da USC.
Nesta ocasión, proxectarase o filme de animación xaponesa Ghost in the shell (1995) dirixido por Mamoru Oshii e considerado un clásico da ciencia ficción e do cyberpunk ao nivel de títulos coma Blade Runner (1982) do director Ridley Scott. O filme, que cuestiona os límites entre o natural e o artificial nun mundo poshumanista, tivo un grande impacto cultural e influíu na creación de obras coma The Matrix (1999) das irmáns Wachowski ou A.I. Artificial Intelligence (2001) de Steven Spielberg.
