O principio DACH baséase no recoñecemento fundamental da diversidade dos países de fala alemá, principalmente Alemaña, Austria e Suíza.
O Centro de Linguas Modernas da USC, o lectorado do Deutscher Akademischer Austauschdienst (DAAD) e Österreichischer Austauschdienst (OeAD), en cooperación co Foro Cultural de Austria en Madrid, a AT Filmakademie e o Goethe-Institut organizan 'DACH-Kino', un ciclo de cinema arredor dos filmes dos países de lingua alemá que pretende dar a coñecer a súa riqueza e a diversidade cultural e lingüística.
Coordinado por Laura Stupperich, Sebastian Windisch e José Manuel Pérez Pena, o ciclo programa do 29 de marzo ao 10 de maio unha serie de seis filmes que destacados das cinematografías alemá, austríaca e suíza. Todas as proxeccións serán os martes ás 19.30 horas no Salón de Actos da Facultade de Filoloxía.
A primeira das sesións terá lugar o martes 29 de marzo coa proxección de Das Leben der Anderen (A vida dos outros, Alemaña, 2006), dirixida por Florian Henckel von Donnersmarck. Contará coa presentación de Laura Stupperich.
Sinopse
O capitán da Stasi, Wiesler, ten que espiar o dramaturgo Dreymann e a súa esposa Christa-Maria Sieland. Este encargo ofrécelle a visión dun mundo de liberdade de pensamento e amor que lle é completamente alleo. Entón comeza a cuestionar a Stasi, os seus métodos e intencións e decátase de que el tamén está máis implicado no sistema do que pensaba.
