O principio DACH baséase no recoñecemento fundamental da diversidade dos países de fala alemá, principalmente Alemaña, Austria e Suíza.
O Centro de Linguas Modernas da USC, o lectorado do Deutscher Akademischer Austauschdienst (DAAD) e Österreichischer Austauschdienst (OeAD), en cooperación co Foro Cultural de Austria en Madrid, a AT Filmakademie e o Goethe-Institut organizan 'DACH-Kino', un ciclo de cinema arredor dos filmes dos países de lingua alemá que pretende dar a coñecer a súa riqueza e a diversidade cultural e lingüística.
Coordinado por Laura Stupperich, Sebastian Windisch e José Manuel Pérez Pena, o ciclo programa do 29 de marzo ao 10 de maio unha serie de seis filmes que destacados das cinematografías alemá, austríaca e suíza. Todas as proxeccións serán os martes ás 19.30 horas no Salón de Actos da Facultade de Filoloxía.
O acto de inauguración do ciclo terá lugar o 5 de marzo e contará coa presenza de Alejandra Ulla, vicedecana da Facultade de Filoloxía e dos organizadores do acto, Sebastian Windisch e Laura Stupperich.
A seguir, proxectarase o filme Vor der Morgenröte: Stefan Zweig ( Stefan Zweig: Adeus a Europa, Austria, 2016), dirixido por Maria Schrader. Contará coa presentación de Sebastian Windisch.
Sinopse
Stefan Zweig (1881-1942) foi un coñecido escritor, biógrafo e activista social austríaco de orixe xudía que se viu obrigado a fuxir do seu país debido ao réxime nazi. Ao estoupar a Segunda Guerra Mundial, refúxiase en París e máis tarde en Londres. Aínda así, Zweig acabará fuxindo xunto coa súa esposa a Sudamérica, instalándose finalmente no Brasil, onde remata por suicidarse en 1942 ante o temor de que o nazismo se estenda por todo o mundo.
