O aforo estará reducido seguindo o protocolo de seguridade. O despacho para retirar as entradas permanecerá aberto desde as 19.00 horas
Este espectáculo de danza e música, a cargo da compañía Pisando ovos, terá lugar na terraza do Auditorio da Universidade, e será de balde ata completar aforo. A función, que comeza ás 20.30 horas e dura 25 minutos, irá seguida dunha sesión do DJ Jas Processor.
'Replay' é unha repetición onde retomar a acción e o pulso seguindo a estela do vinilo. Mentres, o cruce dos corpos e o intercambio en conversa do movemento e da música conseguen darlle unha volta a este espectáculo de Pisando Ovos, que conta coa colaboración especial de Alba Fernández Cotelo · Cía Exire e a súa peza ON, transformándose nunha acción performática.
O festival 'USCénica 2020' terá lugar entre o 1 e o 18 de xullo. Esta iniciativa, que se desenvolverá entre a sala de teatro Roberto Vidal Bolaño, o Salón Teatro e a terraza do Auditorio da Universidade, inclúe tanto funcións de teatro coma concertos. A totalidade da recadación do festival irá destinada á asociación Banco de Alimentos de Santiago de Compostela. A tal efecto, pódese adquirir unha butaca 0 para contribuír a esta axuda sen asistir a ningunha función, facendo un ingreso no nº de conta ES69 0049 1467 29 2010476054 (Banco Santander).
Dado o aforo reducido, non existe a posibilidade de mercar un abono para todo o festival. Unha vez comezada a función non se permitirá o acceso a ningún dos espazos.