Do 23 ao 24 de marzo a Facultade de Xeografía e Historia acolle o segundo encontro do Centenario dos Estudos de Historia na USC
Ao longo do 2023, a Universidade de Santiago de Compostela promove diferentes actividades para conmemorar o cumprimento do primeiro século dos estudos de Historia na institución.
O segundo destes encontros conmemorativos afondará nos 'Retos de futuro para os estudos de Xeografía, Arte e Historia', e desenvolverase no Paraninfo da USC do 23 ao 24 de marzo.
O investigador da École des Hautes Études en Sciences Sociales (EHESS) e director de Annales. Histories, Sciencies Sociales, Vicent Azoulay, impartirá a conferencia inaugural deste foro o xoves 23 ás 9.30 horas, cunha ollada ao futuro dos estudos de Historia.
A partir das 11.30 horas, a investigadora da USC Diana Pelaz Flores, moderará unha mesa redonda arredor do xénero que congregará a Ana María Amorós Pons, da Universidade de Vigo, Mireia Baylina Ferre, da Universitat Autònoma de Barcelaona e Ana Cabana Iglesia, da USC.
A sesión da tarde comezará ás 16 horas coa conferencia 'O futuro dos estudos de Arte', da man do profesor da Universidad Complutense de Madrid, Iñaki Estrella Noriega. Tras a pausa, a partir das 17.30 horas, a docente da USC Fátima Díez Platas moderará unha nova mesa redonda sobre humanidades dixitais na que tomarán parte Miguel Carrero Pazos e Jesús Ángel Sánchez García, da USC, e Ana Nieto Masot, da Universidad de Extremadura.
Xa o venres 24 de marzo a segunda xornada deste encontro arrancará ás 9.30 horas coa conferencia 'O futuro dos estudos de Xeografía', que impartirá a investigadora da Universidad Autónoma de Madrid Josefina Gómez Mendoza. A última das mesas redondas do foro, moderada por Valerià Paül Carril, da USC, reunirá nunha conversa arredor do territorio a Inês Gusman, Federico López Silvestre e José Carlos Sánchez Pardo, da Universidade de Santiago de Compostela.
A clausura do encontro, cuxo programa completo está dispoñible nesta ligazón, está prevista ás 14.00 horas.