O vicerreitor de Organización Académica e Campus de Lugo Francisco Fraga preside este luns 14 de outubro a partir das 11.00 horas no Edificio do Centro de Apoio Científico-Tecnolóxico (CACTUS) de Lugo unha reunión con integrantes de equipos directivos e de orientación de centros de ensino medio de Galicia, para presentarlles as actividades do Programa A Ponte entre o Ensino Medio e a USC. O programa de actividades será presentado polo miúdo pola delegada do reitor para o Ensino Medio e Coordinadora do Programa A Ponte, Maite Flores.
O Programa A Ponte leva en funcionamento dunha forma estruturada desde o curso 2003-2004. Para o presente curso oferta 169 charlas temáticas nas que o profesorado da USC lle achega a súa investigación aos estudantes do último curso de Ensino Secundario Obrigatorio (ESO), Bacharelato e Ciclos Formativos de grao Superior; hai ademais visitas aos centros para presentarlle ao alumnado a oferta que lle ofrece USC mediante charlas informativas, visitas do alumnado de centros de ensino medio a centros da USC e encontros virtuais na Zona USC (encontros por videoconferencia). Así mesmo a USC participa en feiras educativas para dar a coñecer a súa oferta formativa.