María Jesús Giráldez foi reelixida decana da Facultade de Óptica e Optometría co 90% do voto emitido nos comicios que se desenvolveron o pasado 4 de maio
A profesora Mª Jesús Giráldez Fernández tomará posesión do seu cargo como decana da Facultade de Óptica e Optometría o mércores, día 6 de xullo, nun acto que se desenvolverá a partir das 13.30 horas na Aula Magna da Facultade e que presidirá o reitor Antonio López. Reelixida co 90% do voto emitido nos comicios que se desenvolveron o pasado 4 de maio, Giráldez dirixirá este centro da USC xunto ao vicedecano Hugo Pena Verdeal e o secretario Carlos García Resúa.
Como responsable dun centro no que se imparte unha titulación que capacita para o exercicio dunha profesión sanitaria, a de óptico-optometrista, Giráldez propón, como principal eixo de traballo para os vindeiros catros anos, “alcanzar os máximos estándares de calidade na formación dos estudantes, estándares establecidos polo Consello Europeo de Optometría e Óptica, coa vista posta na acreditación do título segundo o Diploma Europeo”.
Traxectoria
A profesora Giráldez tivo cargos de xestión dende o ano 2001 ao exercer de subdirectora da Escola Universitaria de Óptica e Optometría da USC durante nove anos (de 2001 a 2010) e coordinadora do grao en Óptica e Optometría dende 2010 ata a actualidade. Diplomada en Óptica pola Universidade Complutense de Madrid (1990), diplomada en Óptica e Optometría pola Universidade de Granada (1995) e doutora pola Universidade Complutense de Madrid (2010), Giráldez é autora da tese titulada ‘Superficie de lentes de contacto hidroxel: caracterización e a súa relación coa adherencia de microorganismos’, na que achega coñecemento neste ámbito coa intención de evitar complicacións asociadas ao uso de lentes de contacto.
Con tres sexenios de investigación recoñecidos, e sendo a primeira óptico-optometrista en España en conseguir o seu primeiro sexenio de investigación dende a súa condición de diplomada (en 2005, antes de obter o título de doutora), é membro da Escola de Doutoramento Internacional da USC, dende 2011, dentro do programa en Medicina Molecular.