A sesión, organizada no marco do Máster en Dirección de Proxectos da USC, comezará ás 16.00 horas e permitirá coñecer algúns exemplos de proxectos de Intelixencia Artificial orientados a democratizar a toma de decisións, da man desta ex alumna da EPSE
A doutora Laura Ríos Pena, Líder de Machine Learning do equipo de Analytics dunha das maiores empresas mundiais do sector retail, ofrecerá este venres 18, na aula 12 da Escola Politécnica Superior de Enxeñaría do Campus de Lugo da USC, o relatorio ‘A transformación na era dixital. Estratexia e tendencia de futuro’.
Na súa intervención, organizada no marco do Máster en Dirección de Proxectos da USC, Laura Ríos presentará como desenvolve o seu traballo mediante exemplos de diferentes proxectos de Intelixencia Artificial (IA) que teñen como obxectivo democratizar as decisións de forma segura e de como este proceso se pode levar a cabo mediante o liderado nos cambios das organizacións.
A charla desta titulada da EPS de Enxeñaría, onde completou a súa formación como enxeñeira técnica Forestal e enxeñeira de Montes, ademais de facer a súa tese de doutoramento de forma conxunta entre o programa de Enxeñaría para o Desenvolvemento Rural e Civil e a Estación Biolóxica de Doñana do CSIC, está aberta á participación e alumnado, docentes e investigadores do Campus de Lugo.
As persoas interesadas en asistir como público ao relatorio de Laura Ríos Pena poden formalizar a súa solicitude de balde a través do enderezo de correo electrónico manuel.marey [at] usc.es (manuel[dot]marey[at]usc[dot]es).