O luns 29 e o martes 30 de abril desenvólvese na facultade de Filosofía un workshop centrado na filosofía das matemáticas que reúne varios investigadores europeos de renome, como Øystein Linebo, presidente da European Society for the Philosophy of Mathematics; Matteo Plebani, tesoureiro da mesma sociedade); Mary Leng, da Universidade de York, ou José Ferreirós da Universidade de Sevilla.
A xornada ‘Deflacionismo e Objectividade’ é unha boa ocasión para poñer en valor a relación que existe entre as ciencias formais e a filosofía. Unha relación que, no contexto da investigación española ás veces é inesperada ou descoñecida, pero que noutros países de Europa ou América do Norte está plenamente asumida. As presentacións constitúen unha boa mostra de varias liñas de investigación abertas, e de plena actualidade, polo que o evento é de interese para estudantes e persoal investigador de áreas próximas ás matemáticas que desexen abrir os seus campos de investigación.
Como explican os organizadores, Concha Martínez e Ismael Miguéns, “o estatus obxectivo dos nosos recursos cognitivos é unha cuestión filosófica fundamental e especialmente acuciante cando se trata das matemáticas, unha disciplina aparentemente comprometida cun reino de obxectos abstractos e feitos necesarios e inmutables”. Esta peculiar condición das ciencias formais planta algunhas cuestións delicadas: Como dar sentido á variación matemática? Ou é indispensable unha imaxe metafísica tan forte para explicar o estatus obxectivo das matemáticas? En termos máis xerais, advirten, “que conceptos e operacións implicadas nas teorías formais gozan dun estatus obxectivo e cales deben explicarse como xurdidos das nosas actividades de recopilación de coñecementos?”.
Para asistir a este obradoiro, é necesario inscribirse: mconcepcion.martinez [at] usc.es (mconcepcion[dot]martinez[at]usc[dot]es) ou ismael.ordonez.miguens [at] usc.es (ismael[dot]ordonez[dot]miguens[at]usc[dot]es).