A xornada ‘Deporte, adiccións, saúde e convivencia. Desafíos e oportunidades’ desenvólvese este venres 29 de novembro a partir das 9.30 horas na Facultade de Psicoloxía co obxectivo de achegar formación actualizada baseada na evidencia sobre o papel preventivo do deporte na adolescencia. Preside o acto de apertura o delegado do Reitor para o Deporte, Javier Rico, a quen acompañarán o secretario xeral para o Deporte da Xunta de Galicia, José Ramón Lete Lasa; o director xeral de Xustiza, José Tronchoni, e a subdirectora xeral de Estilos de Vida Saudables, Sagrario Pérez Castellanos. O evento será presentado polos xornalistas Terio Carrera e Toni López, da Televisión de Galicia.
O encontro, cuxo comité organizador presiden o presidente da Federación Galega Contra o Narcotráfico, Manuel Antonio Couceiro Cachaldora, e o profesor da USC Antonio Rial Boubeta, está dirixido a profesionais do eido da prevención e os servizos sociais e dos eidos deportivo, educativo e da saúde, así como ao estudantado e ás familias. Artéllase en tres mesas redondas: ‘Adiccións sen substancia e saúde mental. O papel do deporte na adolescencia’, ‘Deporte de elite, tecnoloxía, redes sociais e vida’ e ‘O deporte de base como escenario de oportunidade’.
No evento buscarase promover unha maior sensibilización social sobre a necesidade dun uso saudable das pantallas na infancia e na adolescencia, e favorecer a prevención do uso problemático de Internet e as redes sociais, a adicción aos videoxogos, ao xogo e ás apostas deportivas. Así mesmo promoverase a cultura da prevención comunitaria, a Coordinación institucional e a creación de equipos de traballo.
