A USC colabora coa asociación Special Olympics, co Concello de Santiago e con ASPAS na organización dos Xogos Autonómicos de Atletismo para persoas con discapacidade intelectual
A vixésimo terceira edición dos Xogos Autonómicos de Atletismo Special Olympics desenvolverase o sábado 18 de marzo na nova pista do Estadio de Atletismo da USC.
Esta xornada deportiva contará coa participación de 14 entidades que desprazarán a un total de 192 deportistas con discapacidade intelectual e 48 adestradores. As e os atletas competirán nas probas de velocidade, medio fondo, fondo, salto de lonxitude, salto de altura, lanzamento de peso, marcha, marcha asistida, ou lanzamento de bola (softball) entre outras.
Durante o transcurso das actividades, as e os deportistas terán a oportunidade de votar a aquela entidade cuxos integrantes destaquen pola súa deportividade durante a xornada. A entidade máis valorada recibirá o Premio ás Boas Prácticas de Special Olympics Galicia.