A compañía de teatro USC-Lugo estreará ‘Eréndira e Aríndere’ na apertura dun certame organizado ao abeiro do convenio Lugo Cultural que inclúe unha representación da compañía do IV Ciclo da USC na Casa do Saber o 20 de abril e que rematará co obradoiro ‘Le Salón des Refusés’, a cargo de Miss Beige no Pazo de Montenegro

Cinco compañías universitarias presentarán no auditorio municipal Gustavo Freire de Lugo outras tantas producións artísticas do 17 ao 22 de abril no marco da vixésimo novena edición do Festival de Teatro Universitario, un certame financiado ao abeiro do convenio Lugo Cultural pola USC, Concello de Lugo e Deputación Provincial de Lugo que terá como colofón o obradoiro participativo ‘Le Salón des Refusés’, impartido do 21 ao 23 de abril por Miss Beige no Pazo de Montenegro. As representacións teatrais, a cargo das compañías USC-Lugo e USC-Santiago, Vaites Vaites, Maricastaña, da Universidade de Vigo no Campus de Ourense eo grupo El Mayal, de León, comezarán todas a partir das 20.30 horas e e son de acceso libre e gratuíto para todas as persoas interesadas.
A compañía de teatro USC-Lugo, dirixida por Andrea González, abrirá o 17 de abril a quenda de representacións do XXIX Festival de Teatro Universitario coa estrea da peza ‘Eréndira e Aríndere’. O grupo Maricastaña, da Aula de Teatro Universitaria de Ourense, dirixido por Fernando Dacosta, presentará o día seguinte no ‘Gustavo Freire’ a obra ‘As cidades agochadas’. O festival de teatro universitario de Ludo mundará de escenario o día 20, cando está previsto que a compañía do IV Ciclo da USC ‘Vaites Vaites’, dirixida tamén por Andrea González, represente no auditorio da Casa do Saber ‘Antígona. “Negar a terra aos mortos e negar a humanidade”.
As funcións ‘Los días perdidos’, a cargo da compañía Teatro el Mayal, que dirixe Javier R. de la Varga, e ‘Observacións sobre a felicidade (composición e manexo)’, posta en escena no auditorio Gustavo Freire pola compañía de teatro USC-Santiago, que dirixe Roberto Salgueiro, completarán os días 21 e 22 de abril, respectivamente, a quenda de representacións programadas no marco do XXIX Festival de Teatro Universitario.
Actividades complementarias
O programa desta xa tradicional cita da vida cultural da cidade amurallada inclúe asemade un amplo abano de actividades complementarias, entre as que cómpre destacar un pase da compañía de teatro USC Lugo, dirixida por Andrea González, que ofrecerá o 18 de abril, ás 10.30 horas, un pase da obra ‘Eréndira e Aríndere’ para alumnado de institutos de ensino secundario que reserven a entrada antes do próximo xoves día 13 a través do enderezo de correo electrónico cultura.lugo [at] usc.es (cultura[dot]lugo[at]usc[dot]es).
As sesións ‘Poesía no acto’ Praza Maior, programadas o 19 de abril na galería Solaina, en quendas de 12.30 a 14.30, 17.30 a 18.30 e de 20.00 a 20.30, seguida da presentación do libro ‘Sophie non é o meu nome de guerra’, de Roberto Pascual, Premio Rafael Dieste 2021, completan a oferta dun XXIX Festival de Teatro Universitario que tamén inclúe coloquios ao remate de cada función.