Máis de 150 alumnos realizan na USC as probas de competencia lingüística necesarias para obter o Máster de Profesorado de Secundaria

Máis de 150 alumnos da USC realizan desde o pasado 15 de xaneiro as probas de competencia lingüística B1, nivel que deben acreditar todos os alumnos para a obtención do título de grao do Máster de Profesorado de Secundaria. As probas orais están programadas para os días 22 e 29 deste mes.
Trátase da primeira convocatoria deste tipo de exames de idioma organizados na súa totalidade polo Centro de Linguas Modernas. Haberá unha segunda na primeira semana de xuño, para o que se abrirá o prazo de matrícula a principios de maio.
Cursos intensivos

Por outra banda, o próximo 1 de febreiro comezarán os cursos intensivos de español tanto no campus de Santiago como no Lugo para aqueles alumnos estranxeiros que se incorporan á USC no segundo cuadrimestre. A duración será de 40 horas, desde o 2 ao 22 de febreiro.