Aberta a II convocatoria de proxectos de investigación asociados ás cátedras institucionais
A USC quere consolidar e impulsar a actividade investigadora no eido das Cátedras Institucionais que ten creadas, para o que a Vicerreitoría de Investigación e Innovación acaba de publicar a II convocatoria de proxectos asociados ás devanditas cátedras institucionais da Universidade. Neste senso, financiaranse un proxecto para a Cátedra de Cronicidade e tres proxectos para a Cátedra do Camiño de Santiago e as Peregrinacións.
O período de execución dos proxectos será o comprendido entre o 1 de setembro de 2020 e o 30 de novembro de 2020. O financiamento da presente convocatoria consta dun importe máximo de 8.000 euros. Con cargo a este importe, financiaranse un proxecto para a Cátedra de Cronicidade e tres proxectos para a Cátedra do Camiño de Santiago e as Peregrinacións, cun financiamento máximo de 2.000 euros por proxecto.
Poderán solicitar estas axudas os doutorandos/as, investigadores/as e profesores/as universitarios/as, nacionais ou estranxeiros/as, que desenvolvan a súa actividade investigadora en prol dos ámbitos destas Cátedras Institucionais. A presentación das solicitudes realizarase unicamente por medios electrónicos a través do formulario normalizado dispoñible na sede electrónica da USC e dirixiranse á Oficina de Investigación e Tecnoloxía (OIT). O prazo de presentación de solicitudes é de quince días hábiles contados a partir do seguinte ao da publicación da convocatoria.
Cátedra do Camiño de Santiago e as Peregrinacións
Co obxectivo de fomentar o coñecemento histórico e actual do Camiño de Santiago e das Peregrinacións, así como a promoción e difusión dos valores a eles asociados nas súas diferentes facianas, cumprindo deste xeito cos fins para a que foi creada a Cátedra do Camiño de Santiago e das Peregrinacións da USC, a devandita Cátedra propón tres proxectos de investigación sobre a temática do Camiño de Santiago e as Peregrinacións. Os proxectos seleccionados deberán presentar os seus resultados da investigación na xornada ‘Investigando coa Cátedra do Camiño’ da USC no auditorio da Cátedra e organizada pola mesma en data a determinar polo director.
Cátedra de Cronicidade
Co obxectivo de fomentar o coñecemento dos aspectos relativos á cronicidade das enfermidades, a devandita Cátedra propón un proxecto de investigación neste eido. O proxecto consistirá en coñecer o abordaxe da cronicidade na formación regrada dos médicos nas facultades de Medicina nas universidades nacionais e internacionais. “Este proxecto é precisamente para que se identifiquen e analicen exemplos nacionais e internacionais”, establece a convocatoria.