Aberta a presentación de proxectos ao I Premio IdeaLugo á Innovación e o Emprendemento, dotado con 5.000 euros

O I Premio IdeaLugo á Innovación e o Emprendemento, un certame promovido polo Grupo El Progreso en colaboración coa USC e Abanca, a través do que se busca identificar, recoñecer e impulsar proxectos innovadores e emprendedores xurdidos arredor do campus de Lugo da USC, mantén aberto o prazo de presentación de candidaturas ata o día 1 de novembro.

As persoas interesadas en tomar parte nesta convocatoria, dotada con 5.000 euros en metálico para as tres propostas máis valoradas polo xurado, poden formalizar a súa inscrición no certame a través da páxina web de El Progreso, onde tamén poden consultar as bases, así como a información solicitada aos participantes e os prazos establecidos para a presentación de proxectos.

O apoio a emprendedores con proxectos propios, innovadores e sostibles que contribúan ao desenvolvemento social e económico da provincia de Lugo é unha das pretensións coas que nace o Premio IdeaLugo. Esta convocatoria busca asemade por de manifesto o cometido que cumpre a formación na creación de novas empresas e start-ups, ademais de impulsar e axudar a dinamizar o campus de Lugo da USC e as titulacións universitarias que oferta.

O I Premio IdeaLugo á Innovación e Emprendemento está aberto á participación de estudantes e titulados/as da USC egresados/as do campus de Lugo nos últimos tres anos que teñan un proxecto de emprendemento en fase embrionaria ou de aceleración. As persoas participantes poderán presentar o número de proxectos que desexen, tanto de forma individual como en grupo.