Aberto o prazo de envíos de traballos ao II Congreso internacional sobre fútbol e psicoloxía

O Congreso Internacional sobre Fútbol e Psicoloxía, que se celebrará a finais do mes de xuño, ofrecerá á sociedade unha plataforma de intercambio e transferencia directa de coñecemento entre a universidade e a contorna do fútbol. Está dirixida tanto a profesionais deste deporte como a familias, preparadores e educadores físicos, estudantes, profesorado e persoal investigadores. Baixo a coordinación do profesor Constantino Arce, nesta segunda edición está organizado pola USC e a Federación Galega de Fútbol.

Na actualidade, ata o 30 de abril, está aberto o prazo de recepción de comunicacións e traballos que se agruparán arredor de catro bloques temáticos: fútbol, psicoloxía aplicada ao fútbol, outras disciplinas aplicadas ao fútbol e outros deportes colectivos. O programa definitivo incorporará relatorios convidados a cargos de expertos/as, profesionais, persoal investigador e docentes, así como obradoiros prácticos, exposicións e os traballos libres enviados.