Aberto o prazo de inscrición do programa de visitas a centros de investigación biotecnolóxica

A Unidade de Bioestatística da USC organizará a partir deste mes de outubro unha serie de visitas a centros de investigación biotecnolóxica, dentro das actividades do proxecto ‘ Bioestatística para vivir e como vivir da Estatística’. A finalidade desta iniciativa é dar a oportunidade de coñecer de primeira man cómo funcionan estes centros e as aplicacións reais da estatística aplicada ás Ciencias da Vida e á Saúde. As visitas están dirixidas a todos os públicos.

Actualmente está aberto o prazo de inscrición para coñecer o centro Innopharma, plataforma tecnolóxica aplicada ao descubrimento que xunta as capacidades das plataformas de xenómica e de cribado de fármacos da USC, lideradas por Ángel Carracedo e Mabel Loza, respectivamente. Para poder participar é preciso rexistrarse na web ou a través da páxina de Facebook do proxecto, onde tamén se poderán seguir todas as novidades relativas ao seu desenvolvemento.

O proxecto ‘Bioestatística para vivir e como vivir da Estatística’ está financiado pola Fundación para a Ciencia e a Tecnoloxía a través da convocatoria de axudas para o fomento da cultura científica, tecnolóxica e da innovación 2014. Este é un proxecto nacido co espírito de mostrar a importancia que teñen para a sociedade tanto a Estatística como a bioestatística e transmitir á mocidade o atractivo de ambas como opción profesional de futuro.

O proxecto está promovido pola USC a través da súa Unidade de Bioestatística (GRIDECMB) e polo Instituto Galego de Estatística co apoio da Rede Nacional de Bioestatística (BIOSTATNET).