Aberto o prazo de matrícula do Curso Internacional de Especialista en Rendibilidade Empresarial da Responsabilidade Social Corporativa e Empresarial
As universidades de Santiago de Compostela, Minho, Porto e Trás-os-Montes e Alto Douro e a Cátedra Internacional RSC Santander Galicia-Norte de Portugal promoven o primeiro curso de especialista conxunto en rendibilidade empresarial da Responsabilidade Social Corporativa e Empresarial (RSC/E). É un posgrao que reúne a profesorado especialista das universidades participantes, así como a directivos de grandes multinacionais e das principais entidades do sector bancario, que exporán cómo desenvolven a RSC nas súas entidades. Tamén contará con representantes políticos dos ámbitos da empresa, a industria e a Administración de Galicia e Portugal.
Detectado o crecente interese e a demanda de coñecemento por parte das empresas pequenas, medianas e grandes, a Fundación CEER e as universidades da Eurorrexión, promoven e poñen en funcionamento este curso dirixido a empresarios/as e profesionais interesados en informarse e especializarse nesta materia. Ademais, a partir do 2017, a entrada en vigor das normativas europeas fará necesario que moitas empresas apliquen nas súas estratexias empresariais as metodoloxías, procedementos e procesos de responsabilidade social.
O curso abordará a RSC/E dende todos os ámbitos do seu desenvolvemento: a sustentabilidade ambiental das organizacións, a comunicación empresarial e a creación da reputación corporativa, a normativa que deben aplicar as empresas, o deseño e implantación de plans estratéxicos de RS, a xestión operativa da empresa ética dos negocios, a xestión estratéxica da Responsabilidade Social Corporativa/Empresarial e a Internacionalización da RSC/E.
A inauguración do curso celebrarase o próximo día 31 de marzo, na Universidade de Vigo, e estenderase ata o 30 de setembro. Co fin de permitir a compatibilización coa xornada laboral, as clases serán semipresenciais: distribuiranse en clases en liña e clases presenciais con aulas no campus universitario de Santiago de Compostela e a Porto Business School. O prazo para realizar a matrícula permanecerá aberto ata o próximo 24 de marzo, e terá un límite de 25 prazas. As persoas interesadas poden formalizar a súa preinscrición e solicitar máis información no correo electrónico direccion [at] fceer.org (direccion[at]fceer[dot]org).