Ábrese o prazo para participar no Programa de préstamo de bicicletas da USC

Por cuarto ano consecutivo a USC, en colaboración coa asociación ecoloxista galega Verdeagaia, pon en marcha o Programa de préstamo de bicicletas dirixido a todos os membros da comunidade universitaria tanto do campus de Lugo como de Santiago. Mediante este programa, que coordina a Oficina de Desenvolvemento Sostible da USC dependente da Vicerreitoría de Calidade e Planificación, poranse en préstamo gratuíto 300 bicicletas.
O prazo para presentar solicitudes, obrigatoriamente a través do web, durará desde este venres ata o vindeiro 11 de marzo ás 14:00 horas. As persoas interesadas serán seleccionadas por estrita orde de presentación tendo, iso si, preferencia as solicitudes que realicen tanto os estudantes bolseiros de Sostibilidade, Participación e Integración Universitaria nos centros docentes como os de Aula Verde dos colexios maiores e residencias universitarias.
As listaxes de persoas seleccionadas e de agarda serán publicadas no web do Programa nos días posteriores ao remate do período de solicitude. Xunto coa lista de concesións tamén se publicará o día do mes de marzo en que cada persoa poderá recoller a súa bicicleta.
O programa de préstamo enmárcase nas iniciativas nas que traballa o Plan de Desenvolvemento Sostible para o fomento do uso de medios de transporte alternativos ao automóbil, que permite unha redución das emisións de CO2 e busca conseguir unha menor incidencia doutros problemas asociados ao tráfico como son a contaminación acústica ou a excesiva ocupación de espazos.
Alta participaciónNa convocatoria do curso pasado acadouse unha participación alta -408 solicitudes- correspondendo o 88,7% a estudantes, o 6,7% ao Persoal Docente e Investigador e o 4,6% ao Persoal de Administración e Servizos. A Escola Politécnica Superior de Lugo e a Facultade de Medicina e de Odontoloxía de Santiago foron os centros de maior demanda.
Da campaña do pasado curso que rematou en setembro despréndese que os beneficios para a saúde, a contribución á calidade de vida urbana así como a rapidez son, por esta orde, os motivos para usar a bicicleta nas persoas que tiveron unha da USC en préstamo, segundo se reflicte nunha enquisa. Estas motivacións levaron a que, como se pon de manifesto no estudo anual de mobilidade da Oficina de Desenvolvemento Sostible, en 2008 o uso da bicicleta, aínda manténdose en niveis baixos (3,5% do total da comunidade universitaria), se duplicou respecto do ano anterior.
Descontos para mercar bicicletasA finais de novembro de 2009 a USC asinou un convenio cunha empresa subministradora de bicicletas localizada na cidade de Lugo e con outra en Santiago. Todas aquelas persoas que estean interesadas na adquisición dunha bicicleta gozando das vantaxes do convenio deberán dirixirse a Bicicletas Oliveira, en Santiago de Compostela, e a Hijos de Félix Latorre, en Lugo, e presentar a tarxeta universitaria. Os servizos prestados por estas dúas empresas inclúen descontos tanto na adquisición de novas bicicletas como na de materiais complementarios para os ciclistas, de pezas de bicicletas e man de obra nos arranxos.