Acto de recoñecemento aos mellores estudantes nas probas de acceso á Universidade

704 estudantes pertencentes a 201 centros de ensino medio de toda Galicia acadaron os mellores expedientes nas probas de acceso á Universidade. En total son 265 rapaces e 439 rapazas cunha nota media de 9 ou máis entre o Bacharelato e a fase xeral da proba de Avaliación de Bacharelato para o Acceso á Universidade (ABAU).

O reitor Antonio López Díaz presidiu este mércores 4 o acto de recoñecemento a estes estudantes nunha sesión no Palacio de Congresos e Exposicións de Galicia e que contou coa participación tamén do alcalde do concello de Santiago de Compostela, Martiño Noriega Sánchez. Na mesa, ademais dos vicerreitores e vicerreitoras de Coordinación do Campus de Lugo; de Investigación e Innovación; Comunicación, Cultura e Servizos; e de Estudantes e Internacionalización, participaron tamén o delegado do reitor para o Ensino Medio, Luis Hervella Torrón; o coordinador do programa A Ponte do Campus de Lugo, Javier López González, e o director do IES A Sangriña, Carlos Alonso Rey.

A cerimonia comezou coa intervención de Lidia González Teijido, estudante do IES Concepción Arenal de Ferrol en representación do alumnado, a quen seguiu o director do IES A Sangriña, para dar paso á entrega de diplomas conmemorativos. As palabras do alcalde, primeiro, e posteriormente as do reitor pecharon a xornada. Da provincia da Coruña proceden 317 estudantes, das que 185 son rapazas; seguida de Pontevedra, con outros 223 estudantes (81 rapaces e 142 rapazas); Lugo, con 104 (31 homes e 73 mulleres); e Ourense, con 60 dos mellores expedientes (21 mozos e 39 mozas).