Os alumnos de Administración e Dirección de Empresas celebran este sábado o seu acto de licenciatura

Unha nova promoción de Administración e Dirección de Empresas da Facultade de Ciencias Económicas e Empresarias da USC celebrará este sábado 9 de abril o seu acto de licenciatura. Será ás 17:00 horas no Palacio de Congresos e Exposicións de Santiago. O vicepresidente primeiro e conselleiro delegado de Unión Fenosa, Honorato López, apadriñará á promoción. O reitor da USC, Juan Casares, presidirá a sesión na que Sabela Figueiras e Francisco Javier intervirán en representación dos alumnos e Juan Luis Castromán en nome do profesorado. Deseguido tomarán a palabra o presidente do Consello Galego de Colexios de Economistas; a decana da facultade, Emilia Vázquez; e o padriño da promoción, Honorato López Isla. Tras os discursos, exhibirase un vídeo e farase entrega aos alumnos dos diplomas conmemorativos.