Ampla oferta deportiva no Campus de Lugo para o segundo cuadrimestre

O Campus de Lugo da Universidade de Santiago mantén aberta a oferta de actividades deportivas correspondentes ao segundo cuadrimestre, tanto as dirixidas para a comunidade universitaria como para o público en xeral.

Así, na Aula de deporte e cultura da Facultade de Veterinaria poderase practicar en diversos horarios de mañá e tarde ximnasia de mantemento, aeróbic e Step así como pilates e danza oriental.

As persoas interesadas na esgrima poderán asistir a clases nas noites de martes e xoves na residencia universitaria Bal e Gay, os mesmos días que se impartirá un curso de ioga no ximnasio da Piscina das Pedreiras. Xa no Pazo de Deportes ofrécese acondicionamento físico e Squash.

Actividades externas con descontos
A Área de Deportes do campus lugués ofrece ademais descontos para a comunidade universitaria en actividades externas como o padel, que se desenvolverá no Club Padel Nuestro do Polígono do Ceao, ou a hípica, con cursos mensuais de iniciación e perfeccionamento no Club Equus e actividades para nenos no “Pony Club”. A Universidade de Santiago conta tamén cun equipo de atletismo para participar de xeito gratuíto no Circuíto de carreiras Corre con nós que organiza o Concello de Lugo.

Por outra banda, a USC ten subscrito un convenio co Club Fluvial de Lugo –que conta con piscina climatizada, ximnasio e sauna- para que os estudantes de primeiro e segundo ciclo poidan facer uso a prezo reducido das súas instalacións dende as 08.00 até as 17.00 h. Ademais, ofrécense cursos de tenis de mesa e de tae-kwondo.

Inscrición
A inscrición nas actividades para este segundo cuadrimestre pódese realizar dende a propia páxina web do Servizo de Deportes ou na Oficina de deportes no Edificio da Biblioteca Intercentros.