Ampliado ata o 14 de abril o prazo de participación no Concurso de Proxectos Empresariais Innovadores da USC
A data límite para a presentación de propostas ao Concurso de Proxectos Empresariais Innovadores da USC 2015 amplíase ata o próximo 14 de abril. A viabilidade do proxecto; o grao de innovación do produto, proceso ou servizo, o volume de emprego proxectado; o carácter multidisciplinar do equipo; a consideración das políticas de igualdade e a relación ou interese coa lingua galega son os criterios que se terán en conta na concesión dos premios correspondentes ao décimo quinto Concurso de Proxectos Empresariais Innovadores da USC. Esta iniciativa do programa de creación de empresas da USC, Uniemprende, busca impulsar a creación de empresas innovadoras promovidas por estudantes, titulados e tituladas e persoal investigador, así como a innovación empresarial e a xeración de emprego. O concurso diríxese a estudantes e titulados/as de calquera das universidades galegas e dos centros asociados da UNED en Galicia en calquera área de coñecemento que, de xeito individual ou en equipos, teñan un proxecto empresarial innovador con potencialidade para converterse nunha empresa. Tamén se poderán presentar doutores ou doutoras, así como doutorandos/as, persoal de investigación e alumnado de terceiro ciclo que estea preparando unha tesiña ou que desenvolvan actividades investigadoras en calquera centro de investigación galego. Ademais, a convocatoria está igualmente aberta a empresas xa constituídas ao longo de 2014 e durante o período comprendido entre o 1 de xaneiro e o inicio desta convocatoria. Outorgaranse catro premio: un de base tecnolóxica, dotado con 2.000 euros e ata 24.000 euros de financiamento mediante préstamos participativo; un na modalidade de empresa xove e outro na de muller emprendedora, dotados con 2.000 euros cada un, e un cuarto na modalidade Promoción da lingua galega, que suporá unha achega económica de 1.000 euros. As persoas interesadas poden ampliar a información sobre este convocatoria na web de Uniemprende.