A Área de Deportes organiza para decembro dúas novas rotas de sendeirismo polo Lugo agrario e por Oroso

Os universitarios afeccionados ao sendeirismo así como o público xeral terán no vindeiro mes de decembro dúas novas oportunidades de practicar esta disciplina deportiva con dúas rotas polo Lugo agrario e por Oroso organizadas pola Área de Deportes da USC.
O primeiro do traxecto previsto desenvolverase o vindeiro sábado, día 1 de decembro, por Santa Eulalia de Bóveda discorrendo polo Lugo agrario. O prazo de inscrición permanecerá aberto ata este mércores 28 cun prezo único de 5 euros. Cunha lonxitude de 22 quilómetros e uns graos de desnivel e dificultade medios, a rota partirá ás 10:00 horas da Facultade de Veterinaria e retornará ás 17:00 horas aproximadamente.
A seguinte das citas previstas será o sábado, día 15 de decembro, e transcorrerá por Oroso cunha lonxitude de 15 quilómetros e uns graos de desnivel e dificultade baixos. Para esta xornada, a inscrición poderá formalizarse ata o día 12 de decembro.
Para acadar máis información sobre ambas as dúas propostas, as persoas interesadas poden dirixirse á Oficina da Área de Deportes da USC, na Piscina Universitaria ou nas extensións (981.56.31.00) 15070, 15071, 15072, 15073 ou 15076, así como no correo electrónico deporsec [at] usc.es (deporsec[at]usc[dot]es).
Muro de EscaladaA Área de Deportes vén de abrir o Muro de Escalada emprazado no Estadio de Atletismo, que poderá usarse de luns a venres, en horario de 8:30 a 14:30 e de 15:30 a 21:30 horas. Para acceder a estas instalacións, os usuarios deberán ser maiores de 18 anos e posuír licenza federada de escalada. Ademais, a Área de Deportes ten previsto organizar en breve actividades para a iniciación á escalada.