Os asistentes á Semana do Emprendemento Universitario visitarán as instalacións de Uninova

A Semana do Emprendemento Universitario continúa co desenvolvemento do seu programa de actividades baixo o lema ‘O que te interesa saber antes de crear a túa empresa’. Esta iniciativa organizada pola incubadora de empresas da USC Uninova e cofinanciada polo proxecto Europeo Transtic da Iniciativa Comunitaria Interreg IIIA pretende facilitar aos alumnos universitarios con escaso coñecemento sobre xestión empresarial os criterios de análise precisos á hora de poñer en marcha unha nova iniciativa empresarial.
Na sesión do xoves 15 os participantes nesta Semana visitarán ás 12:00 horas as instalacións da incubadora de empresas da USC, Uninova, para coñecer de primeira man as iniciativas empresariais alí establecidas e realizar un percorrido polas súas instalacións.
O programa de actividades continuará pola tarde, a partir das 16:00 horas, na Facultade de Matemáticas onde se vai celebrar o ‘Taller de Experiencias: Aprende dos que xa emprenderon’, moderado polo xerente de Unixest, Gustavo Marcos. Nesta sesión, os asistentes terán a oportunidade de preguntar directamente a emprendedores universitarios as súas dúbidas sobre aspectos relacionados coas súas experiencia de posta en marcha dun proxecto empresarial.
No Taller intervirán tres empresas procedentes do ámbito universitario como son Micropolis, unha spin-off da Universidade de Porto e da Eurorrexión, Ava Solucións Tecnolóxicas e Salbia Seguridade e Hixiene Alimentaria, estas dúas incubadas en Uninova. Mentres que Micropolis se dedica ao desenvolvemento e produción de polímeros para a súa utilización na industria téxtil, Salbia ten como actividade principal a vixilancia da seguridade e hixiene alimentaria e Ava Consultoría TIC a busca de solucións informáticas integrais.