A Aula de Produtos Lácteos do Campus Terra da USC desenvolve co grupo Citrus un snack funcional de avea fermentada apto para veganos
A Aula de Produtos Lácteos e Tecnoloxías Alimentarias (Aplta) do Campus Terra da USC colabora de xeito activo co grupo alimentario Citrus no desenvolvemento dun novo snack funcional 100% vexetal e apto para veganos, un produto alimentario innovador e único no mercado que comercializará esta compañía con sede en Valencia co nome ‘Es avena!’, que vén de ser distinguido como o produto alimentario máis innovador do ano nos Wabel Awards de París.
A participación da Aula de Produtos Lácteos e Tecnoloxías Alimentarias (Aplta) da USC na creación deste novo produto alimentario que comercializará o grupo Citrus na súa gama de artigos Sun&Vegs produciuse a través dun proxecto Retos, en cuxa convocatoria se pedía o desenvolvemento de produtos fermentados de base vexetal, segundo explicou a xestora da proxectos da Aplta. Patricia Parada sinalou asemade que nunha primeira fase traballouse de xeito experimental con varios cereais, aínda que de seguida se canalizou a investigación cara a avea, cuxo proxecto de fermentación se completou.
Es avena! é o resultado do traballo de I+d+i desenvolvido na Aplta da USC, aínda que na creación deste produto tamén participaron o equipo de I+D+i do Grupo Alimentario Citrus e a Universidade Politécnica de Valencia (UPV). Froito desta colaboración é o novo snack funcional da gama Sun&Vegs de Citrus, un artigo que ben podería considerarse como substitutivo ou cando menos como alternativa dos iogures e outros lácteos tradicionais. Es avena!, composto por ingredientes 100% vexetais e elaborado con fermentos naturais como L. casei e L. Acidophilus, é un produto innovador e cun valor nutritivo potenciado polo proceso de fermentación da bebida de avea, segundo subliña o Grupo Alimentario Citrus.
Respecto á súa comercialización por parte de Citrus, Es avena! chegará aos mercados como un snack para los amantes da saúde e da boa alimentación. A empresa contempla asemade ofrecer este produtos con cinco sabores diferenciados e elaborados con froita 100% natural: froitos vermellos, figo, cirola pasa, frambuesa e granada, ademais do sabor natural (avea).
O responsable de I+D e Innovación da Aula de Produtos Lácteos e Tecnoloxías Alimentarias do Campus Terra da USC, Alfonso Pérez Quintáns, salientou que o desenvolvemento deste produto por parte do Grupo Alimentario Citrus encádrase no marco das novas tendencias do mercado alimentario, un sector que nas últimas datas está a prestar especial atención á crecente demanda da cidadanía de produtos veganos ou vexetarianos e de alimentos que non deparen riscos de alerxias ou intolerancias.
Snack funcional apto para vexetarianos desenvolvido na USC
