A Aula de Produtos Lácteos e Tecnoloxías Alimentarias organiza actividades para escolares polo Día Mundial do Leite

A Aula de Produtos Lácteos e Tecnoloxías Alimentarias da USC organizará este mércores diversas actividades e obradoiros para promover o consumo de produtos lácteos e os seus beneficios para a saúde entre os escolares co gallo do Día Mundial do Leite 2015, unha efeméride que se celebrou en todo o mundo o pasado 1 de xuño.

O programa de actividades, entre as que se inclúe un percorrido polas distintas dependencias e instalacións da APLTA, charlas e obradoiros orientados á elaboración de queixos e iogures, desenvolverase a partir das 9.30 horas, cando está prevista a chegada do primeiro grupo de escolares. Esta xornada de visitas será en quenda de mañá e todos os participantes nesta xornada conmemorativa do Día Mundial do Leite recibirán como agasallo un lote de produtos lácteos cedidos por diversas empresas do sector lácteo.