A Aula de Produtos Lácteos da USC crea ingredientes alimentarios innovadores xunto con Granja Campomayor

A Aula de Produtos Lácteos e Tecnoloxías Alimentarias (APLTA) do Campus Terra da USC desenvolve innovacións alimentarias sostibles xunto coa empresa luguesa Granja Campomayor ao abeiro do proxecto Foodshyegg, unha iniciativa de I+D que conta con financiamento do Centro para o Desenvolvemento Tecnolóxico Industrial (CDTI) con fondos FEDER da Unión Europea e que está orientada á obtención de novos alimentos semellantes a iogures, salsas, untables ou xeados.

O ingrediente acadado neste proxecto a partir da hidrólise de clara de ovo, logo de traballos previos realizados polo CSIC, constitúe unha gran alternativa nutricional que contén proteína de orixe animal de alto valor engadido, segundo indica a técnico da APLTA da USC, Laura Abuín, quen lembra que o novo produto permite a fabricación doutos alimentos que, á súa vez, replicarán propiedades da clara de ovo, un alimento que contén os 9 aminoácidos esenciais.

A innovadora solución alimentaria desenvolvida nas instalacións da APLTA chegará ao mercado previsiblemente a finais de ano en produtos diferentes, tal e como poden ser bebidas UHT, batidos ou outros fermentados. Para a obtención deste ingrediente, os investigadores da APLTA modificaron a formulación e os procesos previamente realizados e patentados polo CSIC. Este cambios permitiron a consecución dun ingrediente líquido pasteurizado, cuxa comercialización é viable durante un período prolongado de tempo, segundo explica Abuín.

A nova solución alimentaria innovadora creada nas instalacións da Aula de Produtos Lácteos e Tecnoloxías Alimentarias é un dos resultados do proxecto Foodshyegg, no que, ademais da empresa Granja Campomayor, con sede no municipio lugués de Palas de Rei, tamén colaboran outros organismos de investigación tal e como son o Instituto de Investigación en Ciencias da Alimentación, dependente do Centro Superior de Investigacións Científicas (CSIC) de España, e o centro tecnolóxico Ainia.

A directora de I+d+i de Granja Campomayor, Eugenia Juncal, e a técnico da APLTA Laura Abuín deron conta dalgunhas das vantaxes que ofrece este novo ingrediente, que permitirá achegar ao consumidor final novas opcións de alimentación mediante produtos saudables e con baixo contido en calorías, graxas e azucres, no marco das últimas xornadas sobre proteínas alternativas na industria alimentaria promovidas na sede universitaria luguesa polo Clúster da Alimentación de Galicia (Clusaga).

Programa

O programa deste foro técnico, organizado para dar visibilidade á innovación alimentaria e amosar avances, tendencias e casos de éxito relacionados coa innovación e a aplicación de proteínas na industria alimentaria, permitiu coñecer máis polo miúdo algunhas das iniciativas desenvolvidas neste eido.

A investigadora e responsable de Proxectos en Biotecnoloxía e Saúde en Anfaco-Cecopesca María José Chapela abriu a quenda de intervencións cunha exposición sobre as oportunidades que deparan as microalgas no Espazo Atlántico como fonte de proteínas e outros compostos de valor. A directora de Tecnoloxías e Ainia, Begoña Ruiz, pechou a primeira quenda de intervencións da xornada co relatorio titulado ‘Proteínas alternativas: single-cell protein, carne in vitro e extrusión proteica’.

A exposición de casos de éxito empresarial derivados do desenvolvemento de alimentos innovadores con alto contido proteico, como pode ser o caso das firmas ODS Protein, Neoalgae, Galinsect ou MOA FoodTech, centrou a segunda palestra de intervencións, durante a que o Co-founder de ODS Protein, Martín Rodríguez, afondou sobre as proteínas fermentadas como fonte sustentable para o futuro. A responsable da Área de Proxectos e Tecnoloxía de Neoalgae, María Álvarez, tratou na súa intervención sobre a aplicación das microalgas na alimentación. Asemade, o CEO de Galinsect, Rubén Recamán fixo unha presentación dos insectos como fonte alternativa de proteína, mentres que o CEO de MOA FoodTech, Bosco Esperanza, deu conta das capacidades desta startup navarra para converter subprodutos da industria alimentaria e novas fontes de proteína.