Axentes da garda civil e policías locais de toda Galicia asistirán na USC a un curso sobre a detección de drogas en condutores

Drogas e condución son as dúas cuestións que centrarán o programa dun curso que coordina o catedrático de Toxicoloxía da USC Manuel López-Rivadulla dirixido especificamente a axentes de tráfico das agrupacións territoriais da Garda Civil e Policía Local e promovido pola Unidade de Formación da Dirección Xeral de Tráfico. Celebrarase na Facultade de Medicina da USC este mércores 21 e o xoves 22 cunha carga lectiva de 20 horas e a participación de 35 axentes de tráfico e policías locais de distintas localidades galegas. O programa está vertebrado en cinco módulos, comezando cunha serie de cuestións xerais introdutorias e seguindo con outro que prestará atención á metodoloxía analítica e prácticas de campo, con especial atención ao tratamento de mostras biolóxicas, interpretación dos resultados e informes e a realización de probas reais cos equipos. O xoves 22 estará dedicado á exploración de signos clínicos e lexislación sobre procedementos, así como ao manexo de dispositivos. Para rematar, o último módulo resérvase para a discusión e autoavaliación das cuestións abordadas. O profesorado encargado do desenvolvemento deste seminario serán os catedráticos de Toxicoloxía da USC Manuel López-Rivadulla e Angelines Cruz; a investigadora da USC Ana de Castro; a subdirectora xeral de Intervención e Políticas Viarios, Mónica Colás; e o xefe da Unidade de Coordinación de Investigación da DGT, Juan Carlos González Luque.