Banco Santander presenta na USC o seu programa de bolsas de prácticas en empresas

O programa de bolsas Santander-CRUE-CEPYME de prácticas profesionais en pequenas e medianas empresas darase a coñecer este venres 13 na Universidade de Santiago nun acto no que se ofrecerán todos os detalles da terceira convocatoria desta iniciativa en Galicia, da que xa se beneficiaron en España preto de 10.0000 estudantes. A presentación do programa, posto en marcha polo Banco Santander a través da súa División Global Santander Universidades, terá lugar ás 12.00 horas no Salón Nobre de Fonseca e nela intervirán o reitor da USC, Juan Casares; e o director territorial de Galicia de Banco Santander, Pablo Berdiel. No acto achegarán ademais a súa testemuña a bolseira Diana Gonçalves Dominguez e a responsable de proxectos da empresa WAYNA, Carolina Lodeiro Malde. O programa ‘Bolsas Santander-CRUE-CEPYME’, cuxo prazo de inscrición finaliza o 31 de xaneiro, destinará máis de 630.000 euros en máis de 350 bolsas de prácticas remuneradas para as universidades galegas en 2014.