A Biblioteca Concepción Arenal continúa co Club de Lectura @nas marxes

¡Escucha hombrecillo!: Discurso sobre la mediocridad (La Linterna Sorda, 2015), de Wilhelm Reich, é a obra proposta polo Club de Lectura @nas marxes para o debate do 26 de febreiro que terá lugar na Biblioteca Concepción Arenal da USC a partir das 19.00 horas.

Este club de debate propón unha obra moi suxestiva de Wilhelm Reich, precursor dos movementos ecoloxistas e antinucleares e da psiquiatría biosocial que atacou duramente a normalidade da sociedade burguesa. O libro, que levantou fortes polémicas cando saíu do prelo en 1948, constitúe unha resposta do autor aos ataques da sociedade neurótica e “emocionalmente pestilente”, como el mesmo a cualificou.

As lectoras e lectores desta obra descubrirán un texto directo, politicamente incorrecto, vangardista tanto no fondo como na forma. Unha crítica mordaz ao home corrente, o pequeno home e a pequena muller, gris e egoísta, suplicando orde e autoridade.

O club
O Club de lectura @nas marxes nace do desexo da Biblioteca de fomentar a lectura na contorna universitaria; un entorno de estudo, traballo e investigación, onde non parece quedar moito tempo para a reflexión, o diálogo e o debate.

As reunións serán os derradeiros venres de cada mes na Biblioteca Concepción Arenal cunhas sesións de arredor hora e media e onde o fundamental é o libro e quen o le. As persoas interesadas poden dirixirse á coordinadora do club, Lourdes Pérez (Tfno.: 881815214, polas tardes), mlourdes.perez [at] usc.es (mlourdes[dot]perez[at]usc[dot]es).