Bota a andar o luns na Casa de Europa da USC o proxecto europeo SOLA para acelerar empresas innovadoras universitarias
A Universidade de Santiago de Compostela acolle do 7 ao 9 de marzo o Kick-Off Meeting do proxecto europeo SOLA (Spin-Off Lean Acceleration), unha iniciativa liderada por RedEmprendia que ten como obxectivo mellorar as capacidades das universidades para acelerar empresas baseadas no coñecemento e a I+D que xeran os grupos de investigación universitarios.
O reitor da USC, Juan Viaño; o presidente de RedEmprendia, Senén Barro; e o alcalde de Santiago de Compostela, Martiño Noriega, inaugurarán o luns 7 na Casa de Europa (Finca Vista Alegre) este primeiro encontro do proxecto, que reúne a representantes de oito universidades de Europa e América Latina.
Durante tres días persoal técnico de incubadoras e centros de apoio ao emprendemento universitario e emprendedores vinculados á USC participarán en diversos obradoiros e intercambiarán coñecementos e boas prácticas. O obradoiro do día 8 de marzo poderá seguirse en streaming directo desde a páxina de USC TV.
SOLA é un proxecto europeo co financiado a través do programa Erasmus+ da Unión Europea. O consorcio do proxecto está formado por RedEmprendia, co apoio de Banco Santander a través de Santander Universidades, a Universidade Autónoma de Madrid, a USC, a Universidade do Porto (Portugal), a Universitá della Calabria (Italia) e a consultora europea Devalar. Desde América Latina participan dúas universidades brasileiras -a Estadual de Campinas e a de São Paulo- e dúas colombianas, a de Antioquia e a EAFIT.
A promotora, RedEmprendia , é unha rede universitaria que desenvolve programas internacionais para apoiar a creación, crecemento e consolidación de empresas baseadas no talento e o coñecemento xerado na universidade. Este ano RedEmprendia impulsa Spin2016, o encontro máis importante dedicado ao emprendemento universitario, que reunirá en Compostela máis de 2.000 emprendedores, estudantes, investigadores, inversores e xente da empresa e repartirá 100.000 euros en premios.