O Campus Terra da USC amplía a formación de asesores agrarios de Galicia cunha estadía na rexión alemá de Münster

O Campus Terra da USC amplía a formación de asesores agrarios de Galicia previamente formados a través dos distintos seminarios celebrados na sede universitaria luguesa cunha estadía de intercambio na rexión alemá de Münster, onde, acompañados de profesores e profesionais técnicos da sede universitaria luguesa, tiveron a ocasión de participar en diversos talleres da conferencia de asesores rurais europeos, ademais de visitar explotacións, granxas e empresas de comercialización de produtos ecolóxicos do estado alemán de Renania-Westfalia.

Os profesores do Campus Terra da USC na Escola Politécnica Superior Florentino Díaz, Enrique Arbones, Martín Barrasa, xunto con Elena López Colmenero, da Aula de Produtos Lácteos e Tecnoloxías Alimentarias (Aplta) da USC, ocupáronse da organización e coordinación desta acción formativa internacional, a través da que 20 asesores rurais galegos pertencentes a entidades públicas e privadas de asesoramento rural, asociacións agrarias e cooperativas realizaron unha estadía profesional e de aprendizaxe durante catro días en Alemaña. Este programa de carácter internacional está financiado nun 75% con fondos Feder do período 2014-2020 e recibe tamén achegas da Consellería de Medio Rural e do Ministerio de Agricultura, Pesca e Alimentación e Medio Ambiente.

Na súa estadía en Alemania, a delegación galega tivo a ocasión de participar na conferencia anual dos asesores rurais europeos (IALB-Taugung), que se desenvolveu baixo o título ‘A agricultura e o asesoramento en transición. Novos camiños entre os mercados globais e as demandas rexionais’. Este foro monográfico, desenvolvido na localidade de Münster, permitiu aos asesores rurais procedentes de Galicia participar en diversos talleres, ademais de visitar explotacións e compartir coñecementos e experiencias de utilidade para completar o programa de formación Cecra, que lles permitirá a obtención do Certificado de Asesores Rurais Europeos.

A delegación galega tamén aproveitou esta acción formativa para coñecer no estado de Renania-Westfalia un sector agrario moi especializado, capaz de operar con éxito tanto en mercados rexionais como globais en gandería, labranza e horticultura, tanto con explotacións convencionais como con produción ecolóxica.

A participación en obradoiros de traballo nos que se abordaron as perspectivas do sector agrario en relación co medio ambiente, nomeadamente coa protección da calidade das augas, e tamén coa adaptación aos cambios da política agraria común, foi outro dos cometidos da delegación galega. Outra das accións incluídas neste programa formativo internacional foron as visitas a diversas explotacións, granxas e pemes, onde os asesores rurais galegos, acompañados de técnicos da Cámara de Agricultura de Renania- Westfalia, puideron coñecer as particularidades e determinar os efectos e a influencia do asesoramento agrario sobre o desenvolvemento e a evolución das citadas explotacións.

Traballo de intercambio en entidades públicas de asesoramento

Os asesores rurais galegos aproveitaron tamén varias xornadas para integrarse en catro entidades diferentes de asesoramento rural pertencentes á Cámara de Agricultura de Renania-Westfalia. O cometido dos técnicos galegos nesta actividade centrouse en coñecer os métodos de traballo, temas de asesoramento, medios e recursos empregados polos asesores rurais locais.

O traballo de asesoramento no ámbito da comercialización dos produtos agrarios completouse con visitas a feiras e mercados locais de proximidade, nos que agricultores e gandeiros ofrecen alimentos de calidade diferenciada directamente ao consumidor final, que, nalgúns casos, é el mesmo quen se ocupa da recolección dos produtos.