Carlos Salgado, novo membro plenario do Comité Europeo para Futuros Aceleradores do CERN

O profesor de Física Teórica da USC e director do Instituto Galego de Física de Altas Enerxías (IGFAE), Carlos A. Salgado, acaba de ser nomeado membro do Plenary European Committee for Future Accelerators (Plenary ECFA), un comité cuxo obxectivo é asesorar á Dirección do CERN, ao Consello do CERN e os seus Comités, ademais doutras organizacións nacionais ou internacionais, na planificación de instalacións europeas de Física de partículas e o desenvolvemento dun programa de investigación adecuado ás necesidades da comunidade científica en Europa. Dende 1966, promove a coordinación internacional e o equilibro de instalacións, recursos e roles entre os laboratorios e institutos universitarios dedicados á Física de altas enerxías.

Propostos polos seus países de orixe e nomeados polo EFCA, os membros do plenario deciden sobre todas as actividades do comité e a admisión de novos países e observadores, ademais de representar os intereses da comunidade de Física de alta enerxía do seu país durante os seis anos que ocupan o cargo, entre outras funcións. Na última reunión do EFCA, celebrada o 13 de xullo, discutiuse como implementar a recentemente aprobada Estratexia Europea de Física de Partículas que guía o futuro desta disciplina en Europa dentro do panorama mundial.

Currículo

Carlos Salgado completou a súa formación na USC co desenvolvemento de diversas estadías na Universidade de París Sur e no CERN, onde traballou por un período de oito anos. En 2019, co financiamento do European Research Council (ERC), recibiu unha axuda Advanced Grant, dotada con 2,5 millóns de euros para un período de cinco anos. Tamén en 2019, foi galardoado co Premio Lois Peña Novo, en recoñecemento ao seu compromiso permanente coa lingua galega na súa actividade investigadora e docente.