A Casa do Saber será unha das sedes da 34 Semana Internacional de Cine de Autor de Lugo

O auditorio da Casa do Saber, no edificio da Vicerreitoría de Coordinación e Planificación do Campus de Lugo, é un dos espazos nos que se realizarán as proxeccións da Semana Internacional de Cine de Autor da capital lucense, que este ano chega á súa trixésimo cuarta edición. Concretamente, a Casa do Saber acollerá a proxección das pezas que compoñen a sección ‘As curtas máis premiadas’, unhas das categorías do certame. O público asistente a cada unha das sesións poderá elixir a mellor curtametraxe de entre as proxectadas mediante as papeletas de votación que se lles entregarán á entrada na sala. No caso da sección de curtametraxes que acolle a Casa do Saber, a entrada será gratuíta ata completarse a capacidade da sala. Ademais desta sede, a 34 Semana Internacional de Cine de Autor de Lugo desenvólvese ata o sábado 22 noutros escenarios da cidade: o auditorio Gustavo Freire, o Museo Provincial, a Biblioteca Provincial, a Galería Sargadelos e o auditorio NovaCaixaGalicia. A Casa do Saber acollerá o luns 17 a proxección dos traballos realizados polos alumnos da Escola de Arte Ramón Falcón de Lugo; e o martes 18, xa dentro da sección ‘As curtas máis premiadas’, emitiranse as pezas Oxitocina, El cortejo, Crisis, Burocracia, 5 millones, Cosqullitas, Au revoir, Fábrica de muñecas e Posturas. O mércores 19 as curtas proxectadas serán Salón Royale, No, Lone-Illness, La mujer del hatillo gris, Amarillo limón, Friensheep e Solo sé que no sé nada. O xoves 20 será a quenda para as obras Luminaris, Profesor Brofman, Purta con puerta, Último beso en Roma, Despejado, L’equip petit, Una flor en recepción e Ngutu. E o venres 21 remata o ciclo ‘As curtas máis premiadas’ coa presentación de La mirada perdida, On my mind, Una historia sin palabras, Viejos perdedores, Niña vértigo, Cielo rojo al amanecer, Clara.El Mar e Los ojos de Laia.