Casares clausura este venres o Máster en Produción de Leite da Politécnica no Centro de Investigacións Agrarias de Mabegondo

O reitor da Universidade de Santiago de Compostela, Juan Casares, presidirá este venres 12 de xullo a clausura da primeira edición do Máster en Produción de Leite da Escola Politécnica Superior, no transcurso dun acto que se desenvolverá a partir das 20.30 horas, no salón de actos do Centro de Investigacións Agrarias de Mabegondo.

A conselleira de Medio Rural e do Mar da Xunta de Galicia, Rosa Quintana; o director da Escola Politécnica Superior do campus de Lugo da USC, Javier Bueno, o director do máster, o catedrático Carlos Álvarez; o coordinador deste título propio da Universidade de Santiago de Compostela, César Resch, e Jesús Moreno, investigador do Centro de Investigacións Agrarias de Mabegondo, tamén intervirán como relatores na cerimonia de entrega de diplomas aos 15 titulados universitarios que completaron este posgrao. A clausura desta primeira edición do Máster en Produción de Leite, ofertado pola Universidade de Santiago e cuxas sesións formativas e prácticas se desenvolven na Escola Politécnica Superior do campus de Lugo e nas instalacións do Centro de Investigacións Agrarias de Mabegondo, servirá tamén para distinguir aos dous mellores expedientes académicos desta primeira promoción do máster, así como para formalizar a entrega do premio dunha estadía de prácticas durante un período de seis semanas nas illas Azores (Portugal) a unha das estudantes deste título propio da Universidade de Santiago.