Casares reitera o compromiso da USC co agro galego na entrega do XIII Premio Aresa, que distingue a Champivil

O reitor da Universidade de Santiago de Compostela, Juan Casares, salientou o fondo compromiso da USC co agro e co medio rural galego no transcurso do acto de entrega da decima terceira edición do Premio Aresa de Desenvolvemento Rural, convocado polo Grupo Aresa e a propia USC, e cuxo xurado acordou conceder á empresa Champivil, centrada na comercialización de produtos vexetais. A empresa gañadora estivo representada neste acto pola súa actual administradora, Luz Divina Castelo, e polo seu pai e fundador deste negocio familiar, Andrés Castelo. A Universidade de Santiago de Compostela leva desde 1495 marcando o camiño a seguir e continuamos nesta tarefa, afirmou Juan Casares. O reitor da USC abundou tamén no marcado perfil agroalimentario do campus de Lugo, unha moderna e compacta sede universitaria que, segundo afirmou, ten contribuído de xeito salientable á progresiva transformación do campo e dos sectores agroforestal e gandeiro a través da transmisión de coñecemento e da maior capacitación profesional das xeracións máis mozas. A Universidade de Santiago seguirá nesta liña, porque o seu compromiso coa sociedade e as persoas é máximo, dixo Casares, para quen non existenten elementos que poñan en dúbida a continuidade desta transmisión de coñecemento e avances científicos e tecnolóxicos desde a institución académica ó conxunto da sociedade. A ligazón da USC co medio rural galego concrétase, se cabe en maior medida, a través do campus de Lugo, que ademais de catalizar as enerxías que axuden á mellora do sector, tamén actúa como nexo de unión, interlocutor, receptor de inquedanzas e transmisor de coñecemento e tecnoloxía. A especialización agroalimentaria dos centros universitarios do campus de Lugo dá boa conta da estreita relación da USC e o medio rural, recordou o reitor. Juan Casares sinalou neste senso que os milleiros de veterinarios egresados da Facultade de Lugo, do mesmo xeito que as numerosas promocións de técnicos agrícolas e forestais, así como as de enxeñeiros agrónomos e de montes saídos das aulas da Escola Politécnica Superior, son unha mostra máis da preocupación da USC polo medio rural e pola súas xentes. O reitor da Universidade de Santiago chamou tamén a unir esforzos entre todos a prol do campo e do medio rural galego, a fin de loitar contra a súa progresiva despoboación, que, na opinión Casares, constitúe xa un problema real e presente máis que unha preocupación. Colaboración universidade-empresa O presidente do grupo Aresa, o empresario Álvaro Rodríguez Eiras, manifestou publicamente o seu agradecemento á colaboración recibida da Universidade de Santiago e que fixo posible a que o Premio Aresa de Desenvolvemento Rural celebre xa a súa decima terceira edición. Rodríguez Eiras recordou que o paso dos anos non mudou para nada a finalidade perseguida polo Premio Aresa, que busca xerar máis riqueza e emprego no campo para así mellorar o grao de benestar das súas xentes. O empresario lugués defendeu tamén a innovación como vía para acadar estes obxectivos, ao tempo que defendeu “o indiscutible valor do campo como xerador de recursos”, razón pola que defendeu a obrigatoriedade de “tomar medidas que extremen o seu coidado e a súa protección para así garantir a súa produtividade”. O director xeral da Sociedade Cooperativa Galega Feiraco e actual presidente da Interprofesional Láctea Española , José Luis Antuña Álvarez, ofreceu no marco do acto de entrega do XIII Premio Aresa unha conferencia baixo o título ‘O sector lácteo no mundo global’. Na súa intervención, Antuña Álvarez fixo unha análise da actual situación pola que atravesa o sector do leite, ao tempo que tamén fixo apuntamentos sobre as transformacións que deben acometer produtores e industrias no futuro inmediato. A administrador da empresa Champivil S.L, Luz Divina Castelo Rey, e o seu pai e fundador desta empresa familiar fundada en 1977, Andrés Castelo, manifestaron o seu agradecemento á Universidade de Santiago e ao grupo empresarial Aresa por terlles concedido este prestixioso premio, que conta ademais cunha dotación en metálico de 10.000 euros. A empresa Champivil, gañadora do XIII Premio Aresa de Desenvolvemento Rural, engade o seu nome a un galardón que na súa edición do ano pasado recaeu na S.A.T. Monte de Trabada. A Asociación Nacional de Criadores de Gando Vacún Selecto de Raza Rubia Galega (Acruga), o grupo empresarial Ingapan, a Facultade de Veterinaria do campus de Lugo da Universidade de Santiago, a queixería Casa Macán, a Denominación de Orixe Ribeira Sacra, o programa da TVG ‘O Agro-labranza’, a IXP Ternera Gallega, o director xeral de Agricultura da Comisión Europea, José Manuel Silva; a Aula de Productos Lácteos da USC, o catedrático de Bioloxía Vexetal da USC, Javier Guitián Rivera, e a empresa Novafrigsa completan o listado de galardoados co Premio Aresa de Desenvolvemento Rural. O cerimonia de entrega do XIII Premio Aresa de Desenvolvemento Rural congregou onte no auditorio Enrique González García da Facultade de Veterinaria do campus lugués a varios centos de asistentes, así como a unha nutrida representación de autoridades políticas, entre as que estaba o alcalde de Lugo, José López Orozco, o subdelegado do Goberno en Lugo, Ramón Carballo, ademais doutros responsables políticos provinciais e autonómicos. O vicerreitor de Coordinación do campus de Lugo, Pedro García Herradón, participou no acto en calidade de secretario do xurado encargado de fallar o premio. A cerimonia de entrega congregou asemade onte na facultade de Veterinaria a un bo número de profesores da USC, ademais da empresaria e membrosdo Consello Social da USC, como Blanca de Cora. O presidente da Audiencia Provincial de Lugo, José Antonio Varela Agrelo, representantes empresariais, clientes e provedores de Aresa, tamén estiveron presentes. Ao remate do acto de entrega do XIII Premio Aresa, todos os asistentes puideron degustar un ágape na entrada do auditorio da Facultade de Veterinaria, onde se serviu un viño español ademais de varios dos produtos vexetais comercializados por Champivil SL e polos seus provedores. Público asisente ao acto de entrega do XIII Premio Aresa no auditorio da Facultade de Veterinaria de Lugo