O catedrático emérito José Manuel Touriñán López ingresa na Academia Hispanoamericana de Doutores
A Academia Hispanoamericana de Doutores acaba de nomear membro de número o catedrático emérito de Pedagoxía da USC José Manuel Touriñán López.
Doutor en Filosofía e Letras pola Universidade Complutense de Madrid, ao longo da súa carreira publicou máis de 300 estudos en forma de artigos e capítulos en libros especializados, así como máis de 50 libros como único autor e unha ducia de traballos en coautoría. A súa obra foi lida e citada en 34 países, consolidando a súa influencia internacional nos estudos de educación, intervención pedagóxica e teoría pedagóxica.
O seu impacto na comunidade académica reflíctese en cifras que o sitúan entre as figuras máis destacadas do campo: o seu índice h en Google Scholar é de 47. No sistema español IN-RECS, está entre os 10 autores máis citados no campo da Educación, e é o profesor de referencia no campo da Teoría e Historia da Educación segundo indicadores de impacto. Como investigador principal, dirixiu 22 proxectos de investigación financiados a nivel rexional, nacional e internacional, e participou en 17 contratos con empresas e entidades públicas.
O profesor Touriñán organizou máis de 50 eventos científicos e pedagóxicos de relevancia nacional e internacional e foi relator ou conferenciante convidado en máis de 150 congresos e seminarios. Unha das súas principais achegas teóricas foi a formulación da Pedagoxía Mesoaxiolóxica e a Construción de Entornos Educativos, unha liña de investigación rexistrada como propiedade intelectual, que orienta a intervención educativa cara á integración de valores comúns e específicos de diferentes áreas culturais. Baseándose nesta proposta, fundou e coordina a rede internacional RIPEME, vinculada a REDIPE, coa que desenvolveu simposios internacionais, materiais didácticos, libros, cuestionarios e coleccións especializadas.