O catedrático José Castillo, Premio SEN Enfermidades Neurolóxicas

O catedrático de neuroloxía e director do Departamento de Medicina da USC, José Castillo Sánchez, acaba de recibir, na undécima edición do acto institucional da Sociedade Española de Neuroloxía (SEN), o Premio SEN Enfermidades Neurolóxicas “polo seu incansable labor no estudo e a difusión científica da neuroloxía”. Recoñécenselle así as súas numerosas investigacións no campo da esclerose múltiple, das cefaleas e das enfermidades cerebrovasculares e neuromusculares, así como os seus importantes esforzos no estudo dos tumores do sistema nervioso central. José Castillo Sánchez é xefe do Servizo de Neuroloxía e director da Área de Xestión de Neurociencias do Hospital Clínico de Santiago de Compostela. Ademais é director científico do Instituto de Investigación Sanitaria de Santiago (IDIS) e coordinador nacional da Rede Temática de Investigación Cooperativa (RETICS) de Enfermidades Neurovasculares (INVICTUS) do Instituto de Saúde Carlos III.