Celébrase na EPS unha xornada sobre calidade na industria láctea

A Escola Politécnica Superior (EPS) do Campus de Lugo acolle este mércores 7 a xornada ‘O reto da calidade na industria láctea’, enmarcada dentro das actividades formativas do Máster Interuniversitario en Industria e Economía Leiteira, que imparte a Universidade de Santiago co Agro-Campus Ouest de Rennes, en Francia, e no que participan conxuntamente a EPS, a Aula de Produtos Lácteos (APL) e a Facultade de Ciencias.
Ao acto de inauguración, que comezará ás 9:30 horas no Salón de Actos da EPS, asistirán o director do centro, Javier Bueno; a coordinadora do máster, Elvira López Mosquera; o decano da Facultade de Ciencias, Francisco Fraga; e como representante da APL, Paz Fernández.
Ao longo desta xornada, que se prolongará ata as 18:00 horas, asistirán como relatores representantes de diferentes empresas como Lactalis ou Feiraco. Rematará cunha mesa redonda que se celebrará pola tarde, coa presenza de Luisa Barreal, como representante do Laboratorio Interprofesional Galego de Análise do Leite (Ligal), entre outros.