O ciclo ‘Ciencias para xoves investigadores’ achegará este mes 250 estudantes de ensino medio á Facultade de Ciencias

A Facultade de Ciencias do campus de Lugo botará a andar este luns 12 de xaneiro a terceira edición das xornadas ‘Ciencia para xoves investigadores’, un programa de estímulo de novas vocacións científicas entre o estudantado de ensino medio impulsado polo persoal do centro universitario lugués.

O programa desta nova edición das xornadas ‘Ciencias para xoves investigadores’ , no que xa formalizaron a súa participación estudantes e docentes de seis institutos de ensino secundario da capital luguesa, desenvolverase entre os días 12 e 22 de xaneiro en quenda de mañá, de 10.00 a 13.30 horas. As distintas sesións programadas ao abeiro deste ciclo presentan unha estrutura semellante. Así, logo dun breve acto de benvida guiado polo decano da Facultade de Ciencias, José Manuel Martínez Ageitos, distintos profesores e persoal do centro universitario lugués conducirán sesións prácticas nos distintos laboratorios do centro, onde os propios estudantes poderán realizar os seus propios experimentos. Un grupo de escolares de 4º curso de ESO do IES Sanxillao de Lugo abrirá este luns, a partir das 10.00 horas, esta nova edición dunhas xornadas que, nos seguintes días, terán como protagonistas alumnado do IES Nosa Señora dos Ollos Grandes, IES Ánxel Fole, Colexio Divino Maestro, Colexio Marista La Inmaculada e Colexio San José.