A ciencia, sen segredos en Lugo
As enerxías renovables, o cambio climático ou a aplicación de diversos produtos químicos, son algúns dos temas que se abordarán na cuarta edición das Xornadas de Divulgación Científico-Tecnolóxicas que este martes comezaron na Facultade de Ciencias do Campus de Lugo.
O programa destas xornadas, organizadas polos propios alumnos do centro, compóñeno dezasete relatorios a cargo de profesores e investigadores da área científica que se prolongarán ata o xoves 20.
As intervenciónsO vicerreitor de Coordinación do Campus de Lugo, Carlos Herrero, abriu ás 10:00 horas deste martes a quenda de conferencias falando de ‘Quimiometría e caracterización dos alimentos’ Seguíronlle a profesora Cristina Cabaleiro, cunha análise sobre ‘O nematodo do quiste da pataca: dos Andes a Xinzo de Limia’; e os profesores Ángel Cobos e Olga Díaz que trataron ‘Os envases comestibles’.
Xa pola tarde, ás 16:00 horas, será a vez de Miguel Blanco e María Isabel Fernández, con cadanseu relatorio sobre ‘Escherichia coli patógenos’ e ‘As aplicacións industriais do manganeso e os seus compostos’, respectivamente.
O mércores 19, a partir das 9:30 horas, Elena Labisbal e Laura Rodríguez tratarán os ‘Modelos de metaloenzimas’, Urbano Fra ‘A gobernanza do risco e a súa avaliación’, Jorge Rivera reflexionará sobre a relación entre ‘Enxeñaría e lexislación’, e José Carlos Quintas tentará dar resposta á pregunta ‘¿Quo vadis planeta?’.
Antonio Rumbo tomará a vez ás 16:00 horas cun relatorio no que analizará ‘Como a química cambia a historia’, e a continuación Julio Seijas e Pilar Vázquez presentarán casos de ‘Química curiosa’.
Na mañá do último día das xornadas, o xoves 20, haberá tres novas conferencias, ‘Fire’ a cargo de José Vázquez; ‘Cambio climático, realidade e esaxeración’ de Gerardo Pereira; e ‘Enerxías renovables empregando microorganismos: biogas, hidróxeno, pilas de combustible microbianas’ da man de Jorge Rodríguez.
Agustín Merino tomará o relevo pola tarde con ‘Implicación dos sistemas agrícolas e forestais no cambio climático’ e Roberto Iglesias farao de seguido con ‘Aprendizaxe e tele-operación para o despregue rápido de robots en contornos descoñecidos’.
A intervención do decano da Facultade de Ciencias, Francisco Fraga, sobre ‘Nanocomposites’ pechará as xornadas ao redor das 19:00 horas.