O Concurso de Ideas Empresariais Innovadoras da USC selecciona os cinco proxectos vencedores este xoves na Cidade da Cultura

O Concurso de Ideas Empresariais Innovadoras da USC selecciona este xoves 28 no Salón Cinc da Cidade da Cultura, entre as 13.30 e as 14.30 horas, as cinco ideas gañadoras do certame.

Dirixido a toda a comunidade universitaria de calquera área de coñecemento da USC, o Concurso de Ideas Empresariais Innovadoras busca premiar aquelas persoas emprendedoras que presenten ideas innovadoras susceptibles de converterse en proxectos empresariais a curto e medio prazo. En total outorgaranse cinco premios de 500 euros, reservando un mínimo de dous para propostas promovidas para mulleres.

O xurado encargado de avaliar as propostas prestará especial atención á viabilidade e factibilidade da idea, carácter innovador, grao de madurez da idea, mercado ao que se dirixe e presenza de políticas de igualdade.