O Consello de Goberno autoriza a contratación como profesorado interino por vacante das prazas anuladas

O Consello de Goberno da Universidade de Santiago autorizou este martes a contratación como profesorado interino por vacante das persoas afectadas pola anulación parcial da Xunta de Galicia do concurso público de setembro de 2012, “facilitándose así a súa continuidade laboral en tanto non se cubran as prazas de xeito definitivo polos procesos correspondentes”, algo “prioritario” para a USC. Do mesmo xeito, e para corrixir o desequilibrio que existiría ao contratar a estas persoas con interinidade por vacante no que se refire ao cómputo de antigüidade, O Consello de Goberno estudará esta tarde que, con carácter transitorio, este grupo de docentes sexan incluídos no grupo de prelación que o contratado doutor. Fin de carreira Ademais, tendo en conta a opinión unánime favorable dos decanos e decanas, na mesma sesión tratarase a implantación na USC dunha convocatoria extraordinaria –adiantada do segundo cuadrimestre ao primeiro– de fin de carreira para as titulacións de grao e máster, o que permitiría ao alumnado rematar os seus estudos sen perder un curso académico. Podería concorrer a esta convocatoria quen teña pendente para rematar os seus estudos unha materia ordinaria do segundo cuadrimestre ou unha anual, ademais do traballo de fin de grao ou máster.