Continúa en A Veiga o curso do Cetur da USC para persoal de oficinas de turismo e guías

O Centro de Estudos e Investigacións Turísticas da USC (CETUR) continúa a desenvolver toda esta semana no Concello da Veiga (Ourense) o VII Curso de Formación para Informadores/as de Oficinas de Turismo e Guías no que se matricularon máis de 30 persoas interesadas no turismo na natureza, tema sobre o que trata a edición deste ano, que por vez primeira transcorre fóra de Santiago e en verán.

As empresas de turismo activo en Galicia, o turismo deportivo en montaña ou en espazos naturais protexidos, as paisaxes, o potencial climático turístico galego, o ecoagroturismo, o deseño de rutas de sendeirismo, os folletos ou as novas tecnoloxías no sector serán algúns dos temas a tratar.

En xeral profúndase nas posibilidades múltiples, tanto prácticas como empresariais, que ofrecen o sendeirismo, o montañismo e o guiado como actividades específicas de turismo na natureza en Galicia. Móstranse deste xeito as peculiaridades dese subsector turístico á vez que se dan a coñecer os recursos culturais existentes no territorio ademais de transmitirlle ao alumnado unha serie de habilidades interpretativas e prácticas, nomeadamente en relación co manexo de novas tecnoloxías da información e de cartografía.

O curso inclúe nesta ocasión unha sesión práctica nas Montañas de Trevinca, o sector máis elevado de Galicia e a única área de alta montaña do país, con seguimento e análise de rutas de sendeirismo sobre o terreo.