Convocado un certame de ensaio libre para colexiais do Rodríguez Cadarso

O Colexio Maior Rodríguez Cadarso e o Centro de Estudos de Seguridade da USC (CESEG) convocan conxuntamente un certame de ensaio libre destinado a colexiais deste centro. A temática deberá versar sobre o impacto da entrada de España nas comunidades europeas no ámbito dos estudos que estea cursando o/a colexial. Esta convocatoria testemuña a dobre conmemoración do 80 aniversario da apertura do colexio maior e o trixésimo aniversario da entrada de España na UE.

Ao certame poderán presentarse residentes que sendo colexiais no momento da convocatoria manteñan a súa residencia no Colexio Maior durante o vindeiro curso, ademais dos que o foran o pasado curso e vai continuar o próximo aínda que en 2015-2016 estean fóra de Galicia por atoparse en programas de intercambio. Os traballos serán valorados por un xurado composto por investigadores/as de recoñecido prestixio integrantes do comité científico do CESEG e premiarase a orixinalidade, calidade e adecuación da proposta.

O prazo de entrega dos traballo será do 10 de marzo ao 10 de abril. Deberán contar cun título que reflicta de maneira fidedigna o contido, presentado en fonte Times New Roman tamaño 12, interliñado dobre, con páxinas numeradas e a súa extensión non excederá as 1.500 palabras. A presentación de traballos realizarase remitindo unha copia en formado PDF ao enderezo de correo cadarso.direccion [at] usc.es (cadarso[dot]direccion[at]usc[dot]es).