A Coordinación do Plan de Desenvolvemento Sostible participa en Madrid na clausura da Caravana Universitaria polo Clima

A Coordinación do Plan de Desenvolvemento Sostible da USC, dependente da Vicerreitoría de Calidade e Planificación, participa este martes 15 na clausura do programa de voluntariado ambiental ‘Caravana Universitaria polo Clima’ que terá lugar na Universidade Autónoma de Madrid.
O proxecto achegou ás universidades a problemática actual do cambio climático e implicou aos membros das diferentes comunidades universitarias na reflexión sobre os comportamentos que se poden impulsar para buscar o compromiso de reducir as emisións de gases de efecto invernadoiro. A iniciativa estivo promovida polo grupo de traballo de Calidade Ambiental e Desenvolvemento Sostible da Conferencia de Reitores das Universidades Españolas (CRUE), a Rede de Universidades polo Clima, a Fundación Biodiversidade e a empresa ALSA.
En concreto, en Santiago celebrouse no mes de febreiro un Carnaval polo Clima, un roteiro verde e unha mesa divulgativa sobre a investigación en materia de cambio climático que se está a desenvolver na USC.
O acto de clausura deste martes inaugurarao o reitor da Universidade Autónoma de Madrid, Ángel Gabilondo, e o vicerreitor de Campus e Calidade Ambiental e Director do Proxecto, Javier Benayas. Intervirán tamén, como representantes das entidades colaboradoras do proxecto, o director de Relacións Institucionais de ALSA, Antonio Llansa; a directora da Fundación Biodiversidade, María Artola González; a secretaria xeral da CRUE, Teresa Lozano; e a presidenta da Comisión do Grupo de Traballo da CRUE para a Calidade Ambiental e o Desenvolvemento Sostible e actual reitora da Universidade de Girona, Ana María Geli.
Previamente ao acto de clausura, haberá unha xuntanza dos técnicos das oficinas ambientais das universidades implicadas no proxecto onde debaterán sobre obxectivos cumpridos, impacto das actividades nas persoas participantes e novas ideas para a busca da continuidade do proxecto nun futuro.