Coordinada pola profesora Mabel Loza, a Rede Española de Excelencia no Descubrimento de Fármacos formalizou un acordo coa plataforma European Lead Factory

A Rede Española de Excelencia no Descubrimento de Fármacos ( REDEFAR) que coordina a profesora Mabel Loza dende a USC e a plataforma paneuropea European Lead Factory (ELF) acaban de formalizar un acordo de colaboración para proxectos conxuntos no ámbito do descubrimento de novos fármacos.

REDEFAR e European Lead Factory comparten interese común no descubrimento e desenvolvemento de compostos, principalmente pequenas moléculas que modulan especificamente a función biolóxica das proteínas diana. Así REDEFAR pode identificar usuarios e proxectos en España co potencial de ser transferidos ás actividades de descubrimento de fármacos a grande escala en European Lead Factory. Deste xeito, o desenvolvemento do ensaio e a experiencia temperá no descubrimento de fármacos coa que conta REDEFAR complementan a alta capacidade de detección de ELF.

REDEFAR
A Rede Temática Española de Descubrimento de Fármacos xurde en 2015 como unha estrutura que permita coordinar, cohesionar, fortalecer e visibilizar as actuais capacidades españolas. Establecéronse diferentes Nodos Temáticos coordinados polos grupos de investigación participantes que entre outras cuestións abordan cuestións relativas a HTS (cribado in vitro), bioinformática, química terapéutica ou modelos in vivo, entre outros.

ELF
European Lead Factory é unha plataforma paneuropea para o descubrimento de fármacos respaldada poa Innovative Medicines Initiative (IMI) que ofrece puntos de partida para o descubrimento de medicamentos a investigadores europeos dende 2013. Comprende unha colección de medio millón de compostos (derivados do seu propio esforzo de síntese e coleccións privadas de empresas) e un centro de selección.