O curso 2013-2014 do Sistema Universitario Galego inaugúrase este venres na USC

A inauguración do curso 2013-2014 do Sistema Universitario Galego celebrarase este venres 6 nunha sesión protocolaria na Universidade de Santiago que comezará ás 12.00 horas no Salón Nobre do Colexio de Fonseca presidida polo conselleiro de Cultura, Educación e Ordenación Universitaria, Xesús Vázquez. Ademais conformarán a mesa presidencial os tres reitores galegos, Juan Casares, da USC; Xosé L. Armesto, da Coruña; e Salustiano Mato, de Vigo; ademais do presidente do Consello Social da USC, Manuel Puga Pereira. Entre outras autoridades civís tamén está prevista a presenza da presidenta do Parlamento de Galicia, Pilar Rojo; do alcalde do concello de Santiago, Ángel Currás; e da vicepresidenta da Mesa do Parlamento, Concepción del Burgo. Logo da apertura solemne do acto, o catedrático de Personalidade, Avaliación e Tratamentos Psicolóxicos, Domingo Esteban Gómez Fernández, pronunciará a lección maxistral titulada ‘Avaliación do acoso psíquico. Horizonte de futuro’. Seguiranlle as intervencións do reitor Juan Casares e do conselleiro Xesús Vázquez que porán o peche a este acto de inauguración oficial do curso universitario.